خزمەتگوزارییەکی گرنگ بۆ ڤایبەر زیاد دەکرێت
پڕۆگرامی تۆڕی پەیوەندیی (ڤایبەر)، چەندین خزمەتگوزاریی گرنگ و سوودبەخشی تێدایە، ئێستاش خزمەتگوزارییەکی دیکە بۆ ئەو پڕۆگرامە زیاد کراوە.
ماوەیەکە کۆمپانیای ڤایبەر، ڤێرژنێکی نوێی پڕۆگرامەکەی بۆ بەکارھێنەرانی بەردەست کردووە، لەم ڤێرژنە نوێیەشدا گۆڕانکارییەک لە گرووپ چاتی ڤایبەردا کراوە و خزمەتگوزارییەکی گرنگی بۆ زیاد کراوە.
لەمەوپاش بەکارھێنەرانی پڕۆگرامی ڤایبەر، دەتوانن زیاتر لە 250 کەس بخەنە نێو گرووپ چاتێکی ڤایبەر، بەم شێوەیەش وەک ژوور (Room)ی چاتی لێ دێت و ھەموو ئەندامانی نێو گرووپەکە، دەتوانن بەیەکەوە چات بکەن و وێنە و ڤیدیۆ، بۆ یەکدی بنێرن.
ئەم خزمەتگوزارییەی ڤایبەر، بۆ بەکارھێنەرانی سیستەمی ئەندرۆید و IOS بەردەستە، بۆ بەدەستھێنانیشی، پێویستە پڕۆگرامەکە لەنێو مۆبایلەکەتدا نوێ (Update) بکەیتەوە.
پڕۆگرامی ڤایبەر، لە سەرانسەری جیھاندا بەکارھێنەرێکی زۆری ھەیە، ھەروەھا بە یەکێک لە باشترین پڕۆگرامەکانی تۆڕی پەیوەندی دەژمێردرێت.
